Lipat Bahay sina Neneng Banga, Ming, at Urbano I at II Sa Bagong UPIS

Muli, hindi inaasahang mapiling muli ang aking katauhan upang i-restore ang mga eskulturang nasira sa University of the Philippines Integrated School.
Kasalukuyan akong nagsusulat ng isang tula nang dumating sa aking opisina si Dr. Gabriel ''Gabby'' J. Paz, pangulo ng Veterinary Practitioners Association of the Philippines (VPAP) na siyang naatasang humanap ng isang eskultor na gagawa sa mga nasirang eskultura sa UPIS na ililipat sa loob ng Pamantasan ng Pilipinas mula sa ngayong kinalalagyan nito sa Katipunan Ave. tapat ng Bgy. Pansol sa Balara.

Dumating sa aking munting galeriya ang nasabing eskultura na walang paa at binti si Neneng Banga.


Si Ming Naman ay walang mukha at lagtas ang dalang lotus. Sina Urbano'y putol ang kalahati ng katawan at tatlong dali ang kapal ng putik at lupa.


Nakagugulat nang linisin ko ang mga nasabing sirang eskultura na diumano'y gawa pa noong dekada 50 ng hindi nakilalang eskultor. Nabura na ng panahon ang mga pangalang nakaukit sa mga rebulto Gawa sa marmol ang mga obra at ayon sa ibang kasamang eskultor ay "baka" ito'y mga lilok ng mga dakilang sina Guillermo Estrella Tolentino at Anastacio Caedo na siyang lumilok ng mga mahahalagang eskultura sa University of the Philippines. Pinangalanan nila itong sina Neneng Banga, Ming, Urbano I, at Urbano II . (dadalawa na ang natirang duwende sa orihinal na pito)



Hindi nabigyang pansin nang mahabang panahon ang mga eskultura dahil sa mga bahid nitong iba't ibang kulay, napag-alaman kong halos may limang patong na ang kulay nito at natabunan ang kagandahan ng angking marmol. Nagdaan din ang obra sa prosesong model clay, minoldehan at binuhusan ng silicon marble at white cement.










Higit isang linggo ang ginasta ko upang maibalik sa dati ang apat na pirasong eskultura at ito'y kinulayan ko ng mistulang antigo ayon sa kanilang edad. Masuwerte ako dahil ito'y pangalawa ng karangalan sa aking pagkatao bilang isang eskultor mulang masimulan kong i-restore ang isang busto ni Leon Maria Guerrero na gawa sa Plaster of Paris ni Guillermo E. Tolentino noong 1953 na natagpuan ko sa isang basurahan sa UP. Isang pagpupugay ang natanggap ko sa mga anak at apo ni Leon Maria Guerrero na sina Chitang Guerrero Nakpil at Liza Nakpil.


Sa darating na Sabado, (December 10, 2011) may Last Fairwell Affair sa UPIS ang Batch nina Dr. Gabby J. Paz, Teresita de Villa,(dating Principal ng UPIS) Gigi Viloria na siyang nangasiwa upang maibalik sa dating anyo ang mga eskulturang nabanggit.

Halina tayo at samahan natin sa tagay sa Sabado ng hapon ang mga dakilang nagpunyagi upang maibalik sa dating anyo ang mga nasirang rebulto sa UPIS.

Tagumpay ang "Eclectic Vision" sponsor exhibit ng Kulayara Art Gallery Camp Crame Rotary Club sa Senate Building, GSIS Bldg. Roxas Blvd Pasay City noong Agosto 8, 2011. Unveiled by Senate President Juan Ponce Enrile. Featuring Sculptors Tata Raul Funilas, Dr. Ton Raymundo and Painter Romulo Galicano. Ang nasabing exhibit ay parangal kay kuya Dan Pinto na siyang Chief ng Printing Division ng Senate na pumanaw noong nakaraang Hulyo 2011. Tumagal ang nasabing exhibit ng tatlong Linggo.

Moog sa Kuta ni Tata Raul Art Center

Saktong animnapung taung gulang ang edad ko noong nakaraang Agosto 8, 2011, parang bumubulong sa akin ang isang guniguning may labit na kudyapi at sumusones ng mga himig na naka-aaliw sa aking ulinig. Tulong na sumasalong sa aking mga palad ang amihan at habagat. Umaawit hinggil sa tubigan, hinggil sa papawirin, hinggil sa kabundukan, hinggil sa pag-ibig. Narahuyo akong maglamas ng pikat at dumaras ng palanas hanggang sa sinutsutan ako ng salamin. Bubog ang linaw, nagsasapirot' diamante. Hanggang nakipagtitigan ako sa aking sarili, matagal na matagal. Binilang ko ang gatla sa aking noo, binilang ko ang bigote at balbas, at pinalitaw ko ang isang panghabangbuhay na napakatamis na ngiti. Natatapos umawit ang guniguni'y nakikita kong lumuluwal ang aking kakambal.

Pinaswitan ko't pinababa ang isang moog sa kabundukan, pinaswitan ko't pinalipad ang masasamyo't mahalimuyak na bulaklak, pinaswitan ko't pinalawit ang pinakamarikit na tala at ini-andas ko ang lumuwal kong kakambal at nilagyan ko ng isang Credo:

Kuta ni Tata Raul Art Center
Bgy. Tabon Mainit, Binangonan, Rizal

"Sa Gulong ng alon at bugso ng hangin,
Sa konting tiyaga'y makararating din."

Makata
Eskultor
Artista
Mangingibig
Ama
Inmortal

Moog na ipamamana ko sa aking mga anak at apo.

Nagbukas ang Ciento Cingcuenta sa Pinto Art Gallery sa Antipolo City noong nakaraang Linggo (Oktubre 16, 2011 at magtatagal ng isang buwan), lahat ng painting, drawing, sculpture ay hinggil kay Rizal. Ito'y sa pangunguna ni artist Ruel Caasi isandaan at limampung artista ang lumahok dito kasama ang inyong lingkod.

Pang-anim na Taong Paglilok ng Tropeo ng PLCPD

Pang-anim na taon na pala akong lumililok ng tropeo ng Philippine Legislative Committee on Population and Development Foundation Inc.(PLCPD) Bagaman pitong taon nang naitatag ang naturang institusyon. Unang lilok ko ng tropeo ay kahoy sa atas na rin at usapan namin na noo'y Executive Director Romeo Dongeto na siyang nag-aprub ng aking naipresintang eskultura. Apat na taong kahoy ang nililok kong tropeo ng PLCPD. Napalitan ito ng glass noong nakaraang taon at higit na nagustuhan nina Senador Chiz Escudero at Congressman Edcel Lagman na siyang namumunong Senador at Diputado sa PLCPD.

Ngayon ay kasalukuyan kong hinuhulma ang labing-isang tropeo para sa mga mapipiling magigiting nating Reporter sa diyaryo, radyo, at telebisyon na siyang gagawaran ng papugay sa darating na Nobyembre 29, 2011.

Muli na namang malalahiran ng mantika ang aking nguso na laging nanunulis kapag nilililok at hinuhulma ang tropeong maglalambayog sa mga dakila nating mamamahayag sa bansa nating hindi na maka-ahon sa mga suliranin. Dangan nga'y sa sikat na Gateway Mall sa Araneta Center ginaganap ang reception.

Binibigyan din ako ng papuri at ipinakikilala sa mga dumadalong mararangal at kagalang-galang na panauhin na siyang lumilok ng kanilang kinasasabika't gusto ring mapasakamay na tropeong umaalimbukad kapag natutudla ng dagitab ng maniningning na lampara sa bulwagang pinagdarausan ng paggagawad ng parangal.

Muli, maraming salamat sa pamunuan ng PLCPD na patuloy na nagtitiwala sa himas ng aking huklubang palad, may maibabahagi akong muli sa mga dadalaw at makikipamasko sa akin sa darating na kapaskuhan.

Marami ding salamat sa ngayo'y Executive Director Ramon San Pascual at sa mga staff ng PLCPD na laging sumusuporta sa akin lalo na kay Dodie.